रसुवा नाका सञ्चालनमा आउन कम्तीमा पन्ध्र दिन लाग्ने

काठमाडौँ/ २ कात्तिक, तीन दिन लगातार परेको वर्षापछि आएको बाढी पहिरोले सडक क्षतिग्रस्त हुँदा रसुवा भन्सार नाकाबाट मालवस्तु अझ कम्तीमा १५ दिन लाग्ने भएको छ । गत असोज ११, १२ र १३ गते लगातार परेको वर्षापछि आएको बाढी र पहिरोले चीनतर्फको रसुवा नाका जोड्ने राजमार्ग क्षतिविक्षत हुँदा उक्त सडक सञ्चालन गर्न कम्तीमा अझ १५ दिन लाग्ने चिनियाँ पक्षले बताएको छ ।
जिल्ला प्रशासन कार्यालयका सहायक प्रमुख जिल्ला अधिकारी सरस्वती अधिकारीले चीनतर्फको बाटो खुलाउन चिनियाँ पक्षसँग निरन्तर संवाद भइरहेको बताउँदै संवादमा बाटो खुलाउन निरन्तर काम भइरहेको चिनियाँ पक्षले बताएको बताउनुभयाे । प्रवक्तासमेतको जिम्मेवारी रहनुभएकी अधिकारीले चिनियाँ पक्षले सडक खुलाउन तीव्र काम भइरहेको र अबको कम्तीमा १५ दिनमा सञ्चालन हुने जानकारी प्राप्त भएको बताउनुभयाे ।
यस्तै नेपाल हिमालयन सीमापार व्यापार संघका महासचिव रामचन्द्र पराजुलीले  नेपालतर्फको बाटो  सुचारु भएको तर चीनतर्फको सडक बनाउन कम्तीमा १५ दिन लाग्ने स्थानीयले बताएको जानकारी गराउनुभयाे। महासचिव पराजुलीले एक्कैपटक चीनसँग जोडिएका सर्वाधिक महत्वपूर्ण दुई नाका रसुवाको केरुङ र सिन्धुपाल्चोकको तातोपानी नाकाबाट चीनतर्फबाट मालवस्तु आउन बन्द हुँदा नेपालमा चिनियाँ उत्पादित उपभोग्यवस्तुको मूल्य वृद्धि हुने बताउनुभयाे । साथै पराजुलीले लामोसमय सडक बन्दहुँदा चीनतर्फबाट आयात गर्ने व्यापारीहरू मर्कामा परेको र चीनतर्फ निर्यात गर्ने व्यापारीहरू समेत समस्यामा परेको बताउनुभयाे।
यता सिन्धुपाल्चोक उद्योग वाणिज्य संघका अध्यक्ष एवं व्यवसायी बुद्धराज बस्नेतले तातोपानी नाकाहुँदै आउने नेपालतर्फको सडकका दुईओटा पुल लार्चा र लिपिङ खोलाको पुल र केही ठाउँको सडक मर्मत पछि आयात निर्यात सुचारु हुने बताउनुभयाे । उहाँका अनुसार उक्त पुल र सडक बनाउन सरकारले तदारुकताका साथ काम गरे एक हप्तामै सडक सञ्चालन हुने बताउनुभयाे ।