मुलपानीमा काठमाडौं २ का आजपा उम्मेदवार थापाको सम्पर्क कार्यालय स्थापना

काठमाडौं, २४ माघ । काठमाडौंको मुलपानी, पिपलबोटमा आम जनता पार्टी (आजपा)का सहअध्यक्ष एवं काठमाडौं क्षेत्र नं. २ का उम्मेदवार तिलक थापामगरको सम्पर्क कार्यालय आज स्थापना भएको छ ।

साँखुका ७५ बर्षीया पदमा गुरुङले सो कार्यालयको उदघाटन गर्दै उम्मेदवार थापामगरलाई बिजयीको शुभकामना व्यक्त गरिन् । सोही क्षेत्रबाट स्वतन्त्र उम्मेदवारी दिन तयारी गरेका जेपी बज्राचार्य संयोजक र कालबहादुर विक सहसंयोजक रहने गरी १०१ सदस्यीय निर्वाचन परिचालन कमिटीको समेत घोषणा गरिएको छ ।

‘मोबाइल छापमा सबैको भोट ! भ्रष्टाचारीहरूलाई दरिलो चोट !!’ भन्ने मुल नारा सहित सम्पर्क कार्यालय उदघाटनमा स्थानीय, पार्टीका नेताकार्यकर्ता लगायतको विशेष सहभागिता रहेको थियो ।

सो अवसरमा स्थानीय भक्तबहादुर गुरुङले स्थानीयको समस्या समाधानका लागि दिनरात जनताको सेवामा लागिरहने तिलक थापामगरलाई बिजयी गराउन सबै एकजुट भएर लाग्नुपर्ने बताए ।

कार्यालय उदघाटन कार्यक्रममा आजपाबाट काठमाडौं १ का उम्मेदवार कमल सुवेदी, काठमाडौं २ का उम्मेदवार तिलक थापामगर, काठमाडौं ३ का उम्मेदवार रुपसागर उपाध्याय, काठमाडौं ५ का उम्मेदवार कोमल पौडेल, काठमाडौं ६ का उम्मेदवार सफलता बोगटी, काठमाडौं ८ का उम्मेदवार खगेस रन्जित, भक्तपुर १ का उम्मेदवार देवेन्द्र ठाकुर, भक्तपुर २ का उम्मेदवार देवकुमारी साह, ललितपुर २ का उम्मेदवार लखिन्द्र साहको विशेष सहभागिता रहेको थियो ।

यसैगरी आजपाका समानुपातिक उम्मेदवारहरु विक्रम बम, प्रतिमा थापामगर, कालबहादुर विक, धनकुमारी जोगी, नानुमाया तामाङ, आशा श्रेष्ठ, सर्मिला लिम्बु, उमा श्रेष्ठ सहित स्थानीय सर्वसधारण, बुद्धिजित, पार्टीका नेताकार्य लगायतको विशेष सहभागिता रहेको थियो ।

कार्यालय उदघाटन कार्यक्रमलाई सम्बोधन गर्दै काठमाडौं २ का उम्मेदवार थापामगरले यस क्षेत्रबाट जितेका नेताहरुले यहाँको समस्या समाधानमा चासो नदिएको आरोप लगाए । गुणस्तरीय शिक्षा, स्वास्थयका साथै सुकुम्बासी, खानेपानी, रोजगारी लगायतको समस्या रहेको र त्यसलाई समाधान गर्न पहल गर्नुपर्ने माग स्थानीयले गरेको उनले बताए ।

‘ठुलाठुला कुरा गरेर यस क्षेत्रबाट यसअघि निर्वाचन जित्नेले काम नगर्दा स्थानीयले आक्रोश व्यक्त गरिरहेका छन् । काठमाडौं क्षेत्र नं. २ मा खानेपानी, गुणस्तरीय शिक्षा, रोजगार लगायतको समस्या समाधान गर्नुपर्ने माग उहाँहरुको रहेको छ,’ आजपा उम्मेदवार थापामगरले भने, ‘काठमाडौं मुलुककै संघीय राजधानी हो तर यहाँबाट बिजयी नेताले काम नगर्दा स्थानीयलाई समस्या छ ।’

अहिलेको सिस्टम सुधार, भ्रष्टाचार, कुशासन, अनियमितताको अन्त्यका लागि आफूले आजपाबाट उम्मेदवारी दिएको बताउदै खानेपानी, गुणस्तरीय शिक्षा, रोजगारीका लागि पहल गर्ने प्रतिबद्धता व्यक्त गरेका छन् । आजपाले विगतदेखी नै काठमाडौंको सुकुम्बासी समस्या, खानेपानी समस्या, रोजागारी समस्या, मनोमानी कर आतंक बिरुद्ध संघर्ष गर्दै आएको बताउदै यि समस्याहरुको समाधान आफूहरुले नै गर्ने बताए ।

यस्तै सहकारी पीडित, लघुवित र वितिय संस्थाका पीडितलाई न्याय दिलाउन समेत पार्टीले गरेको संघर्ष, आन्दोलनको बारेमा जानकारी गराउदै आउँने दिनमा पनि संघर्षका कार्य जारी राख्ने थापामगरले बताए ।

काठमाडौं क्षेत्र नं. २ मा रहेको मनोहरा खोला सहित खोलाबाट पीडितलाई न्यायदिलाउनकै लागि आफूले यस क्षेत्रबाट उम्मेदवारी दिएको उनले बताए । आफू पनि काठमाडौंबासी र मनोहरा खोला पीडित नै भएको बताउदै उनले यहाँको वास्तविक समस्याको बारेमा जानकार रहेका र त्यसलाई समाधान गर्ने प्रतिबद्धता व्यक्त गर्दै थापामगरले ‘मोवाइल’ छापमा मतदान गरी आजपाका उम्मेदवारलाई बिजयी बनाउन अनुरोध गरे ।

काठमाडौंको धर्म, संस्कृती, रितिरिवाज, कला, साहित्य लगायतको संरक्षण, जर्गेना गर्दै अगाडी बढने बताउदै उनले काठमाडौंलाई देशबासीको मुख्यशहरको रुपमा रहेको र सोही अनुसार काम गर्ने प्रतिबद्धता व्यक्त गरे ।