मिर्चैयाको स्थानीय पाठ्यक्रममा गम्भीर त्रुटि ! कक्षा ५ को ‘मिर्चैया नगरको परिचय’मै तेन्जिङ–हिलारीको पाठ

सिरहा । मिर्चैया नगरपालिकाद्वारा लागू गरिएको स्थानीय पाठ्यक्रम ‘हमर (हाम्रो) मिर्चैया’ मा गम्भीर त्रुटि भेटिएको छ । कक्षा ५ को पाठ्यक्रमको पहिलो एकाइमै स्थानीय विषयवस्तुसँग असम्बन्धित पाठ समावेश गरिएको पाइएको हो । स्थानीय पाठ्यक्रमअन्तर्गत ‘मिर्चैया नगरको परिचय’ शीर्षकको पहिलो एकाइको ‘विषयवस्तु’ कोलममा पाँचौँ पाठका रूपमा “तेन्जिङ नोर्गे र एडमन्ड हिलारीको योगदान” शीर्षक राखिएको भेटिएको छ । ‘मिर्चैया नगरको परिचय’ खण्डमा विश्वकै सर्वोच्च शिखर सगरमाथा आरोहणसँग सम्बन्धित व्यक्तित्वको पाठ समावेश गरिनुले पाठ्यक्रम निर्माण प्रक्रियामै प्रश्न उठाएको छ । स्थानीय पाठ्यक्रमको मूल उद्देश्य स्थानीय इतिहास, संस्कृति, भाषा, भूगोल, कृषि, पेशा, परम्परा तथा समुदायबारे विद्यार्थीलाई जानकारी गराउनु हो ।

तर, मिर्चैया नगरपालिकाको परिचयसम्बन्धी अध्यायमै तेन्जिङ नोर्गे र एडमन्ड हिलारीको प्रसंग राखिनुले पाठ्यक्रम निर्माणमा लापरबाही भएको आशंका गरिएको छ । कक्षा ५ को एकाइ एकको पहिलो पाठका रूपमा ‘नगरपालिकाको भौगोलिक (फाँट, पाखा, पहाड)’, दोस्रो पाठका रूपमा ‘वडाको सिमाना छुट्याउने गरी नगरपालिकाको नक्सा तयार गर्ने अभ्यास’, तेस्रो पाठका रूपमा ‘प्राकृतिक सम्पदाहरूको संरक्षणका उपायहरू’, चौथो पाठका रूपमा ‘नगरपालिकाले प्रदान गर्ने सेवाहरू’ रहेका छन् भने पाँचौँ पाठका रूपमा ‘तेन्जिङ नोर्गे र एडमन्ड हिलारीको योगदान’ रहेको छ । शिक्षा क्षेत्रका जानकारहरूका अनुसार यस्तो त्रुटिले स्थानीय पाठ्यक्रमको विश्वसनीयतामाथि प्रश्न उठाउने मात्र होइन, विद्यार्थीमा भ्रमसमेत सिर्जना गर्न सक्छ ।

“स्थानीय पाठ्यक्रम भनेको स्थानीय सन्दर्भ, पहिचान र मौलिकतासँग जोडिनुपर्छ,” एक शिक्षा सरोकारवालाले भने, “मिर्चैयाको परिचय अध्यायमा सगरमाथा आरोहणको पाठ राखिनु सामान्य त्रुटि होइन ।” यस विषयमा प्रतिक्रिया लिन नगर शिक्षा समितिका अध्यक्षसमेत रहेका नगर प्रम्ख र नगरपालिकाका शिक्षा शाखाका कर्मचारीहरूसँग सम्पर्क गर्न खोजिए पनि फोन सम्पर्क हुन सकेन । नगरपालिकाको आधिकारिक धारणा आउन बाँकी रहेको छ । स्थानीय अभिभावक तथा शिक्षा सरोकारवालाहरूले पाठ्यक्रम तत्काल पुनरावलोकन गरी यस्ता त्रुटि सच्याउन माग गरेका छन् । उनीहरूले स्थानीय पाठ्यक्रम निर्माणजस्तो संवेदनशील विषयमा विशेषज्ञता, अध्ययन र जिम्मेवारी आवश्यक पर्ने बताएका छन् ।