माता बगलामुखीको मूर्ति प्रतिस्थापन तथा प्राण प्रतिष्ठानको १२औँ वार्षिकोत्सव सम्पन्न

रामचन्द्र दुलाल
काठमाडौँ, असोज ९ । काठमाडौँ महानगरपालिका वडा नं. ७ चावहिलमा अवस्थित माता बगलामुखीको मूर्ति प्रतिस्थापन तथा प्राण प्रतिष्ठानको १२औँ वार्षिकोत्सव शुक्रबार सम्पन्न भएको छ । चावहिल मैजुबहालमा अवस्थित माता बगलामुखीको मूर्तिलाई खटमा राखेर स्थानीय व्यक्तिहरूले बोकी शोभा रथ यात्रा गर्ने प्रचलन रहँदैआएको छ । परिक्रमाको क्रममा स्थानीयबासीहरूले माता बगलामुखीको दर्शन गरी भक्तजनहरूलाई जल, फूलप्रसादले स्वागत गर्ने प्रचलन रहँदैआएको मंगलामुखी मन्दिर संरक्षण तथा व्यवस्थापन समाजका अध्यक्ष नारायणप्रसाद सिंखडाले बताउनुभयो । उहाँकाअनुसार यसपटक वर्षात्का कारण माता बगलामुखीको मूर्तिलाई खटसहित गाडीमा राखेर बाजागाजासहित शोभा रथ यात्रा गरिएको छ । जसको लागि माता बगलामुखी मन्दिरबाट मैजुबहाल–लाहुरेटोल–श्रम स्कुल–सामुदायिक भवन– गौरीघाट–चावहिल पिपलबोट–चावहिल चुच्चेपाटी हुँदै पुनः मैजबहाल मन्दिर पुगी समापन गरियो । समापन पछि स्थानीयबासीहरुलाई समाजले प्रसाद खुवाउने परम्परा रहेको छ ।
स्थानीयबासीहरूको सहभागिता र सहयोगले विगत १२ वर्षदेखि यो कार्य गरिँदै आएको समाजका अध्यक्ष सिंखडाले बताउनुभयो । १३ सदस्यीय उक्त समाजमा उपाध्यक्ष वसनारायण डंगोल, सचिव नितिन श्रेष्ठ, कोषाध्यक्ष विजय मानन्धर, सदस्यहरूमा अच्यूतप्रसाद पुडासैनी, मञ्जु शर्मा, सावित्री थापा, उमा खकुरेल, कल्पना प्रधान श्रेष्ठ, निरज कालिका, कृष्णबहादुर प्रजा, रेणुका पाण्डे आचार्य, पविन पण्डित क्षेत्री रहनुभएको छ ।