भ्रामक समाचार सम्प्रेषण नगरिदिन पूर्व मन्त्री खड्का सचिवालयको अनुरोध

काठमाण्डौ / मंसिर ७,नेपाली कांग्रेसका नेता एवं पूर्व उर्जा, जलस्रोत तथा सिंचाई मन्त्री दिपक खड्काका बारेमा केही सन्चारमाध्यममा भ्रामक समाचार सम्प्रेषण भएको भन्दै उनको सचिवालयले खण्डन गरेको छ ।

खड्काका स्वकीय सचिव कुमारबाबु अधिकारीले केही अनलाइन तथा समाचार माध्यममा नेपाली कांग्रेसका नेता तथा पूर्वमन्त्री दिपक खड्काको नाम जोडेर अनर्गल प्रचार एवं भारत गएको भनी भ्रामक समाचार सम्प्रेषण भएकोप्रति गम्भीर ध्यानाकर्षण भएको बताएका छन् ।
उनले भनेका छन्- “पार्टी कामको सिलसिलामा उहॅा गृह जिल्ला संखुवासभा जाने- आउने तथा काठमाडौंमै नियमित रूपमा जनता, पार्टी कार्यकर्ता र जिल्लावासीसॅग भेटघाट गरिरहनु भएको छ । कार्यकर्ता र जिल्लावासीको सदैव सुख दुःखमा साथ दिने उहॅाको कामबाट केही ब्यक्तिहरू किन त्रसित भएर कुप्रचार गर्न खोजिरहेका छन् ? बुझ्न गाह्रो छैन । “

उनले सामाजिक सन्जाल फेसवुकमा लेखेका छन्- राज्यको चौथौं अंगको रूपमा रहेको मिडिया जगतले सत्यतथ्य नबुझि कसैले नियोजित रूपमा चलाएको हल्लाकै भरमा समाचार प्रकाशन गर्दा आम मानिसमा मिडियाप्रति कस्तो भावना विकास होला ?

स्वकीय सचिव अधिकारीले पूर्वमन्त्री खड्काले स्काउट जग्गा भाडा २० करोडभन्दा बढी तिरेको भएपनि बदनाम गराउन भाडा तिरेन भन्ने आरोप लगाएको समेत बताएका छन् । उनले भने- डेढ वर्षदेखि ठेक्का तोडेर ताला लगाएर स्काउटले राखेको जग्गामा एक रूपैयॅा पनि उठाउन सकेको छ ? पैसा तिर्ने कै बदनाम गराउनेले खै भाडामा लगाउन सकेको ??
केही अनलाइनले पूर्वमन्त्री खड्का भारत भागेको भन्दै गलत समाचार सम्प्रेषण गरेका थिए ।