बेमौसमी वर्षाले धान बालीमा क्षति पुर्‍याउँदा किसान मर्कामा 

काठमाडौं/ १९ कातिक, हावाहुरीसहित आएको वर्षाले सिन्धुपाल्चोक, काभ्रे, सर्लाहीलगायतका किसानले लगाएको धान बालीमा क्षति पुर्‍याएको छ। बेमौसमी वर्षाले धान बालीमा क्षति गरेपछि किसान मर्कामा परेका छन् । 
काटेर खेतमै सुकाएको धान वर्षाको पानीमा डुबेको छ । कतिपय स्थानमा काट्न बाँकी रहेका धान हावाले ढालेको छ । खेतमा सुकाउन राखेको धान डुबेको तथा हावाका कारण धान ढल्दा किसानलाई क्षति पुगेको छ ।
यसले उत्पादनमा असर गर्ने किसानको दुःखेसो छ । मुखमै आइसकेको बाली पानी परेर भिजेपछि यतिबेला किसान चिन्तित छन् । चन्द्रनगर गाउँपालिका–१ लघुवाका किसान शंकर रामले बेमौसमी पानीका कारण किसानहरु मर्कामा परेको जानकारी दिनुभयाे ।
वर्षाका कारण काटेर खेतमा सुकाउन राखेको धान डुबेको छ भने काट्न बाँकी रहेका केही स्थानका धान हावाले ढालेको उहाँले बताउनुभयाे । ‘बेमौसमी वर्षाले किसानको मुखमै आइसकेको धान बालीमा क्षति पुर्‍याएको छ, कतिपय खेतमा पानीमा बालासहितको धान तैरिरहेको छ, भने कतिपय किसानको काट्न बाँकी रहेको धान हावाले ढालेको छ,’ उहाँले भन्नुभयाे, ‘प्रकृतिले पनि हामी किसानलाई नै ठग्दो रहेछ ।’
यहाँ केही दिनअघिदेखि नै बादल लागेर मौसम धाम्मधुम्म भइरहेको थियो । किसानले पाकीसकेको धान डराई डराई काटेर सुकाईरहेका थिए ।
आइतबार विहान जिल्लाको उत्तरी क्षेत्रमा दक्षिणी क्षेत्रको तुलनामा ठुलो पानी परेको थियो । जिल्लाको उत्तरी क्षेत्रमा छिटो पाक्ने तथा दक्षिणी क्षेत्रमा ढिलो पाक्ने धान किसानले लगाउँदै आएका छन् ।
वर्षाले भर्खरै छरिएको तोरी, चना, मसुरो लगायतको दलहन बाली तथा आलु, गोलभेंडा, काउली जस्ता तरकारी बालीमा पनि क्षति पुर्‍याएको छ । कृषि ज्ञान केन्द्र मलंगवाले बेमौसमी वर्षाले किसानलाई क्षति गरेको जनाएपनि यकिन तथ्यांक संकलनको काम भईरहेको जनाएको छ ।
पाकेर लहलह भएको धान भित्र्याउने बेला मुसलधारे पानी परेपछि अत्यन्तै पीडा परेको बताउनुहुन्छ सिन्धुपाल्चोकका एक किसान।