फ्रान्समा डढेलोको कहर : आगजनी र लापरवाहीको आरोपमा ४२० जना पक्राउ

काठमाडौँ । फ्रान्समा यस वर्ष दोस्रो विश्वयुद्धपछिकै सबैभन्दा ठूलो डढेलो क्षति भएपछि आगलागीको कारणबारे बहस चर्किएको छ।

भीषण गर्मी, लामो समयदेखिको खडेरी र जलवायु परिवर्तनले आगो फैलिन अनुकूल अवस्था सिर्जना गरे पनि फ्रान्सेली अधिकारीहरूले अधिकांश डढेलो मानवीय गतिविधिका कारण सुरु भएको बताएका छन्।

अभिलेखअनुसार फ्रान्समा हुने करिब १० मध्ये नौ वटा डढेलो मानिसकै कारण सुरु हुने गरेको देखिएको छ। यही आधारमा सरकारले जानाजानी आगो लगाउने तथा लापरवाहीका कारण आगलागी गराउनेमाथि कारबाही तीव्र पारेको छ। यद्यपि ठूलो संख्यामा पक्राउ गरिएको विषयमा कानुनी विज्ञहरूले प्रश्नसमेत उठाएका छन्।

फ्रान्सको आन्तरिक मन्त्रालयका अनुसार जानाजानी वा दुर्घटनावश आगलागी गराएको आरोपमा ४२० जना पक्राउ परेका छन्। पक्राउ पर्नेमा १६६ जना नाबालिगसमेत छन्।

दक्षिण–पूर्वी फ्रान्सको वार क्षेत्रमा एक २३ वर्षीय पुरुषले पाँच दिनको अवधिमा जानाजानी १० वटा आगो लगाएको आरोप लागेको छ। दोषी ठहरिएमा उनलाई १५ वर्षसम्मको जेल सजाय र १ लाख ५० हजार युरोसम्म जरिवाना हुनसक्ने बताइएको छ।

त्यस्तै, केही अभियुक्तलाई पक्राउपछि छिट्टै अदालतमा उपस्थित गराएर सजायसमेत सुनाइएको छ। भोसज क्षेत्रको राओन–ला–उएटापे जंगलमा तीन पटक आगो लगाएको आरोप लागेका एक व्यक्तिलाई तीन वर्षको जेल सजाय सुनाइएको छ। उक्त घटनामा केही वर्गमिटर वनस्पति मात्र जलेको बताइएको छ।

फ्रान्समा डढेलोको जोखिम बढिरहेका बेला मानवीय गतिविधि, जलवायु परिवर्तन र आगलागी नियन्त्रणका उपायलाई लिएर बहस थप तीव्र बनेको छ।