प्रधानमन्त्री बालेन्द्र शाहको निजी क्षेत्रसँग छलफल

काठमाडौँ । प्रधानमन्त्री बालेन्द्र शाह ले उद्योग–व्यवसाय प्रवर्द्धन, लगानीमैत्री वातावरण निर्माण तथा आर्थिक सुधारका विषयमा निजी क्षेत्रका प्रतिनिधिहरूसँग उच्चस्तरीय छलफल गरेका छन्।

बुधबार प्रधानमन्त्री तथा मन्त्रिपरिषद्को कार्यालयमा भएको छलफलमा प्रधानमन्त्री शाहले मुलुकको आर्थिक गतिविधिलाई चलायमान र सशक्त बनाउने, उद्योग–व्यवसाय सञ्चालनलाई सहज बनाउने, लगानीमैत्री वातावरण सिर्जना गर्ने तथा नीतिगत र प्रक्रियागत अवरोध हटाउने विषयमा विस्तृत छलफल भएको प्रधानमन्त्रीको सचिवालयले जनाएको छ।

छलफलका क्रममा प्रधानमन्त्री शाहले आर्थिक विकास, लगानी विस्तार, रोजगारी सिर्जना र उत्पादन वृद्धिमा निजी क्षेत्र सरकारको महत्वपूर्ण साझेदार रहेको उल्लेख गर्दै उद्योगी–व्यवसायीले भोगिरहेका व्यावहारिक समस्या समाधान गर्न सरकार प्रतिबद्ध रहेको बताए।उनले उद्योग तथा निजी क्षेत्रमैत्री वातावरण निर्माणका लागि आवश्यक नीतिगत, कानुनी र प्रशासनिक सुधारलाई प्राथमिकताका साथ अघि बढाइने प्रतिबद्धता पनि व्यक्त गरे।

निजी क्षेत्रका प्रतिनिधिहरूले उद्योग–व्यवसाय प्रवर्द्धन, लगानी विस्तार, नीतिगत स्थिरता, सेवा प्रवाहलाई थप प्रभावकारी बनाउने तथा सरकार र निजी क्षेत्रबीच नियमित एवं परिणाममुखी संवाद आवश्यक रहेको सुझाव दिएका थिए।प्रधानमन्त्री शाहले प्राप्त सुझावलाई गम्भीरतापूर्वक कार्यान्वयनमा लैजाने प्रतिबद्धता जनाउँदै सम्बन्धित निकायमार्फत आवश्यक सहजीकरण र सुधारका काम अघि बढाइने बताए। उनले आर्थिक सुधारको अभियानमा सरकार निजी क्षेत्रसँग सहकार्य गर्दै अघि बढ्ने स्पष्ट पारे।

छलफलमा अञ्जन श्रेष्ठ, उज्ज्वलकुमार श्रेष्ठ, राजेशकुमार अग्रवाल, डा. घनश्याम ओझा, कमलेशकुमार अग्रवाल तथा दीपक मल्होत्रा लगायत निजी क्षेत्रका प्रतिनिधिहरूको सहभागिता रहेको थियो। सरकार र निजी क्षेत्रबीच भएको यस उच्चस्तरीय संवादले उद्योग–व्यवसाय प्रवर्द्धन, लगानीको वातावरण सुधार तथा निजी क्षेत्रमैत्री नीतिनिर्माणलाई थप प्रभावकारी बनाउन सहयोग पुग्ने विश्वास व्यक्त गरिएको छ।