प्रधानमन्त्री बालेन्द्र शाह र एडीबी अध्यक्ष कान्डाबीच भेट, विकास साझेदारी थप सुदृढ बनाउने प्रतिबद्धता

काठमाडौं । प्रधानमन्त्री बालेन्द्र शाहसँग मासातो कान्डा नेतृत्वको Asian Development Bank (एडीबी) प्रतिनिधिमण्डलले मंगलबार शिष्टाचार भेटवार्ता गरेको छ।

प्रधानमन्त्री तथा एडीबी अध्यक्षबीच भएको करिब आधा घण्टाको भेटमा नेपाल सरकार र एडीबीबीच विगत ६ दशकदेखि कायम विकास साझेदारीलाई अझ प्रभावकारी र सुदृढ बनाउने विषयमा छलफल भएको प्रधानमन्त्रीका प्रेस तथा अनुसन्धान विज्ञ दीपा दाहालले जानकारी दिइन्।

भेटका क्रममा प्रधानमन्त्री शाहले सुशासन, पारदर्शिता र प्रभावकारी कार्यसम्पादनमार्फत नेपालको विकासले नयाँ गति लिने विश्वास व्यक्त गरे। साथै जलविद्युत्, पर्यटन, डिजिटलाइजेसन तथा पर्यटकीय सडक पूर्वाधार विकासका क्षेत्रमा एडीबीसँग सहकार्य विस्तार गर्ने विषयमा सकारात्मक छलफल भएको बताइएको छ।

एडीबी अध्यक्ष कान्डाले नेपालमा विकास सहयोगलाई अझ विस्तार गर्ने प्रतिबद्धता जनाउँदै नेपालको आर्थिक विकास र समृद्धिका लागि एडीबी दीर्घकालीन तथा विश्वसनीय साझेदारका रूपमा निरन्तर साथ रहने बताए।

उनले नेपालको आर्थिक सम्भावना, युवा नेतृत्व र सुधारप्रतिको प्रतिबद्धताको प्रशंसा गर्दै नेपालको विकास यात्रामा एडीबीले निरन्तर सहयोग गर्ने प्रतिबद्धता दोहोर्याए।