प्रत्यारोपण केन्द्र विस्तारका लागि जग्गा उपलब्ध गराउने प्रक्रिया छिट्टै टुङगोमा पुग्छ : मन्त्री बस्नेत

काठमाडौँ । स्वास्थ्य तथा जनसंख्यामन्त्री मोहन बहादुर बस्नेतले शहीद धर्मभक्त राष्ट्रिय प्रत्यारोपण केन्द विस्तारका लागि जग्गा उपलब्ध गराउने प्रक्रिया सरकारले अघि बढाएको बताएका छन् ।

शनिबार बिहान काठमाडौंमा शहीद धर्मभक्त राष्ट्रिय प्रत्यारोपण केन्द्र र अंग प्रत्यारोपण समाज नेपालद्वारा आयोजित प्रथम राष्ट्रिय प्रत्यारोपण सम्मेलनमा बोल्दै उनले प्रधानमन्त्रीको पटक पटकको निर्देशन पछि केन्द्र विस्तारका लागि जग्गा उपलब्ध गराउने प्रक्रिया अघि बढाएको बताएका हुन् । बिरामीको खचाखच हुने केन्द्रको थप विस्तारका लागि सरकारले पहल गरि रहेको बताउँदै भक्तपुर र नागर्जुनमा पनि छिट्टै जग्गा उपलब्ध गराउने बताए ।

उनले भने- “जग्गा उपलब्ध गराउनका लागि सम्मानिय प्रधानमन्त्रीबाट पटक पटक निर्देशन आइसकेको छ । अब जग्गाको लागि भौतारि रहनुपर्ने अवस्था छैन । जग्गाको विषय चाडो भन्दा चाडो टुङगोमा पुर्याउन मन्त्रालयले कुनै कसर बाँकी राख्दैन ।”

उनले आफू मन्त्री भएर आएपछि चिकित्सा क्षेत्रमा व्यापक सुधारका काम भैरहेको बताए । चिकित्सा क्षेत्रको सुधारमा प्रधानमन्त्रीबाट आफूले चाहेको भन्दा धेरै सहयोग पाएको समेत बताएका थिए ।