परराष्ट्रमन्त्री शिशिर खनाल आज भारत भ्रमणमा

काठमाडौं । परराष्ट्रमन्त्री शिशिर खनाल आज (शुक्रबार)देखि भारतको औपचारिक भ्रमणमा जाने भएका छन्। भारतीय विदेशमन्त्री डा. एस. जयशंकरको मैत्रीपूर्ण निमन्त्रणामा हुन लागेको तीनदिने भ्रमण आइतबारसम्म चल्नेछ।

परराष्ट्र मन्त्रालयले बिहीबार जारी गरेको विज्ञप्तिअनुसार भ्रमणका क्रममा परराष्ट्रमन्त्री खनालले नयाँ दिल्लीमा भारतीय विदेशमन्त्री डा. जयशंकरसँग औपचारिक भेटवार्ता गर्ने कार्यक्रम रहेको छ। भेटमा व्यापार, लगानी, ऊर्जा, सम्पर्क सञ्जाल तथा जनस्तरका सम्बन्धलगायत नेपाल–भारत द्विपक्षीय हितका विविध विषयमा छलफल हुने जनाइएको छ।

मन्त्रालयका अनुसार उच्चस्तरीय भ्रमणको नियमित आदानप्रदानअन्तर्गत हुन लागेको यस भ्रमणले नेपाल–भारतबीचको दीर्घकालीन, बहुआयामिक तथा पारस्परिक हितमा आधारित सम्बन्धलाई थप सुदृढ बनाउन सहयोग पुग्ने अपेक्षा गरिएको छ। परराष्ट्रमन्त्री खनाल जेठ २४ गते स्वदेश फर्किने कार्यक्रम रहेको छ।

यसैबीच, परराष्ट्रमन्त्री खनालले सरकार सुशासन, आर्थिक समृद्धि र तीव्र विकासको लक्ष्यसहित अघि बढिरहेको बताएका छन्। नागरिकको बढ्दो अपेक्षा पूरा गर्न सरकार, निजी क्षेत्र, विकास साझेदार तथा अन्य सरोकारवालाबीच प्रभावकारी सहकार्य आवश्यक रहेको उनले उल्लेख गरे।

उनले क्षेत्रीय तथा बहुपक्षीय मञ्चहरूमा नेपालको आवाज र राष्ट्रिय प्राथमिकतालाई प्रभावकारी रूपमा उठाइरहेको बताउँदै विकास साझेदारीलाई थप व्यवस्थित, पारदर्शी र परिणाममुखी बनाउनुपर्नेमा जोड दिए। साथै, स्थानीय तहलाई सशक्त बनाउनु नै विकास निर्माणका कार्यक्रम तथा सामाजिक क्षेत्रका गतिविधिहरूलाई प्रभावकारी बनाउने प्रमुख आधार भएको उनको भनाइ छ।