परराष्ट्रमन्त्री डा. देउवा र भाजपा विदेश विभाग प्रमुख डा.चौथाइवालेबीच भेट

काठमाडौं/५ भदौ, परराष्ट्रमन्त्री डा।आरजु राणा देउवा र भारतीय जनता पार्टीका विदेश विभाग प्रमुख डा।विजय चौथाइवालेबीच भेट भएको छ । बुधबार नयाँ दिल्लीमा परराष्ट्रमन्त्री डा. देउवासँग विदेश विभाग प्रमुख डा. चौथाइवालेले भेट गर्नुभएको हो । परराष्ट्रमन्त्री डा. देउवालाई भेट्न डा.चौथाइवाले होटलमै पुग्नुभएको थियो । ।

भेटमा नेपाल–भारत सम्बन्धका विविध आयाम, नेपाली कांग्रेस र भाजपाबीचको सम्बन्ध लगायतका विषयमा छलफल भएको परराष्ट्रमन्त्री डा. देउवाले सामाजिक सञ्जालमार्फत जनाउनुभएको छ । डा. देउवाले भन्नुभएको छ, ‘मैले भारत भ्रमणका क्रममा प्राप्त स्वागत तथा आतिथ्यका लागि भारत सरकार र भारतीय जनतालाई उहाँमार्फत धन्यवाद पनि व्यक्त गरें ।’

भाजपाका विदेश विभाग प्रमुख डा. चौथाइवालेले पनि भन्नुभएको छ, ‘आज मैले परराष्ट्रमन्त्री डा. आरजु राणा देउवालाई भेटेको छु र, उहाँलाई यस महत्वपूर्ण पदमा वहाँको नियुक्तिको लागि बधाई दिएँ । हामीले भारत–नेपाल सम्बन्धलाई मजबुत बनाउने विभिन्न नयाँ अवसरका बारेमा छलफल गर्यौ’

भारतको औपचारिक भ्रमणमा रहनुभएकी परराष्ट्रमन्त्री डा. देउवाले यसअघि भारतीय प्रधानमन्त्री नरेन्द्र मोदी, विदेशमन्त्री डा. एस. जयशङ्करसँग भेट गरिसक्नुभएको छ। भारतीय प्रधानन्त्री मोदीले परराष्ट्रमन्त्री डा. देउवालाई निकै विशिष्ट सम्मान र स्वागत गर्नुभएको छ । मोदीले परराष्ट्रमन्त्री डा. देउवालाई प्रधानमन्त्रीहरूलाई भेटका क्रममा दिने गरेको विशिष्ट सम्मान दिएको चर्चा छ ।