न्याय माग्न मिटरब्याजपीडितहरु फेरि आए काठमाडौँ

काठमाडौँ । तराई-मधेशलगायत विभिन्न जिल्लाबाट खानेकुरा बोकेर पैदल आएका मिटरव्याज र लघुवित्तपीडितहरूले सिंहदरबारअगाडि प्रदर्शन गर्ने भएका छन् । हाल थानकोटको खुल्ला चौरमा चुलोचौको थापेर बसेका उनीहरू माग पूरा नभएसम्म घर नफर्किने अडानमा छन् ।
तीन वर्षदेखि आन्दोलन गरिरहेको भए पनि मागको सुनुवाइ नभएकाले संघीय राजधानी काठमाडौँ आउन बाध्य भएको पीडितहरुको गुनासो छ । उनीहरूले लघुवित्त र वित्तीय संस्थालाई सामन्तीको संज्ञा दिँदै खारेज गर्न, सामूहिक ऋण मिनाहा गर्न पनि माग गरेका छन् । मिटर व्याज र लघुवित्तले जग्गाजमिन नै लिलाम गर्ने अवस्था आएकाले बाध्य भएर आफूहरु न्याय माग्न काठमाडौं आएको पीडितहरुको भनाइ छ ।
गएको चैत्र महिनामा पैदलयात्रा गर्दै काठमाडौं आएर पीडितहरूले धर्ना दिएपछि सरकारले विशेष अदालतका अध्यक्ष गौरीबहादुर कार्कीको अध्यक्षतामा मिटरब्याजपीडित जाँचबुझ आयोग गठन गरेको थियो । आयोगले प्रतिवेदन बुझाइसके पनि समस्या समाधान हुन नसकेपछि पीडितहरु पुनः आन्दोलनमा जुटेका हुन् ।