नेपालले आजबाट ४० मेगावाट बिजुली बंगलादेश पठाउने

काठमाडौं/ ३० कात्तिक, नेपाल विद्युत प्राधिकरणले आजदेखि ४० मेगावाट बिजुली बंगलादेश निर्यात गर्दै छ। भारतले अन्तिम स्वीकृति दिएसँगै बंगलादेश विद्युत निर्यात गर्न लागिएको हो ।
भारतीय ग्रीडको प्रयोग गरी नेपालबाट बंगलादेश ४० मेगावाट विद्युत प्रवाह शुभारम्भ कार्यक्रम शुक्रबार मध्याह्न १२ बजे नेपाल, भारत र बंगलादेशका उर्जामन्त्रीको भर्चुअल सहभागीतामा गरिने भएको छ ।
यस अघि नै नेपाल विद्युत् प्राधिकरण, बंगलादेश पावर डेभलपमेन्ट र भारतको विद्युत् व्यापार निगमबीच त्रिपक्षीय सम्झौता भने भइसकेको छ । भारतीय प्रसारणलाइन प्रयोग गरेर नेपालको बिजुली बंगलादेश लैजानुपर्ने भएकाले त्रिपक्षीय सम्झौता भएको हो । सम्झौता भए पनि भारतले प्रसारणलाइन प्रयोग गर्ने अनुमति दिएको थिएन ।
प्राधिकरणले भारतीय अनुदानमा निर्माण भएको तथा आफ्नो स्वामित्वमा रहेको २५ मेगावाटको त्रिशूली र सहायक कम्पनीमार्फत निर्माण गरिएको २२ मेगावाटको चिलिमे जलविद्युत आयोजनाहरुबाट उत्पादित विद्युत बंगलादेश निर्यात गर्ने तयारी गरेको छ ।
बंगलादेश निर्यात हुने विद्युतको मिटर मुजफ्फरपुरमा रहने छ । मुजफ्फरपुरबाट भारतको प्रसारण लाइनमार्फत बहरामपुर (भारत)-भेरमारा (बंगलादेश) ४०० केभी प्रसारण लाइन हुँदै बंगलादेश विद्युत् पुग्नेछ ।
नेपालले जुन १५ तारिखदेखि नोभेम्बर १५ तारिखसम्म ५ महिना बिजुली निर्यात गर्न सक्छ । प्रत्येक महिना २८ हजार ८०० मेगावाट आवर विद्युत निर्यात गर्ने छ । प्रतियुनिट बिजुलीको मूल्य ६.४ सेन्ट हुनेछ ।