नेपालमै बनेको विद्युतीय स्कुटर प्रवद्र्धनमा सरकारको साथ रहने अर्थमन्त्री वाग्लेको प्रतिबद्धता

sasmita pathak २०८३ श्रावण ३१, आईतवार , प्रकाशित अर्थतन्त्र

काठमाडौं । अर्थमन्त्री डा. स्वर्णिम वाग्लेले नेपालमै डिजाइन तथा उत्पादन भइरहेको विद्युतीय स्कुटरको प्रवद्र्धनका लागि सरकारको साथ रहने बताएका छन् ।

काठमाडौंको बूढानीलकण्ठस्थित सिप्रदी यात्रीको कारखानामा पुगेर नेपालमै निर्माण गरिएको पहिलो विद्युतीय स्कुटर ‘यात्री पीटू’ उत्पादन प्रक्रियाको अवलोकन गर्दै उनले यस्तो बताएका हुन् ।

अर्थमन्त्री वाग्लेले नेपाली इन्जिनियर तथा डिजाइनरको मेहनतबाट नेपालमै विद्युतीय दुईपांग्रे सवारीसाधन निर्माण हुनु ऐतिहासिक उपलब्धि भएको बताए । उनले गुणस्तरमा विश्वस्तरीय प्रतिस्पर्धा गर्न र नेपाली उत्पादनलाई अन्तर्राष्ट्रिय बजारमा विस्तार गर्न कम्पनीलाई सुझाव दिए ।

‘यात्री पीटू नेपालमै डिजाइन भएर निर्माण हुनु सुखद कुरा हो । गुणस्तरमा विश्वस्तरीय प्रतिस्पर्धामा अब्बल हुनुहोस्, अघि बढ्नुहोस् । सरकार तपाईंहरूको साथमा छ,’ उनले भने ।

वाग्लेले नेपालमै उत्पादनको दायरा विस्तार गर्न आग्रह गर्दै विश्व बजारमा प्रतिस्पर्धा गर्न आवश्यक रणनीति बनाउनुपर्ने बताए । उनले अन्तर्राष्ट्रिय ब्रान्डको उदाहरण दिँदै नेपालमै सम्भव हुने डिजाइन तथा उत्पादनका कामलाई प्राथमिकता दिनुपर्ने धारणा राखे ।

‘सरकारले के–के सहयोग गर्नुपर्ने हो भन्नुस् । विश्व बजारमा पुर्‍याउन अरू के गर्न सकिन्छ, त्यसमा पनि सोच्नुहोस्,’ उनले भने ।

नेपाली उत्पादन विश्व बजारमा स्थापित होस् भन्ने शुभकामना दिँदै अर्थमन्त्री वाग्लेले नेपाली ब्रान्डलाई विदेशमा रहेका नेपालीले समेत रोज्ने वातावरण बनाउनुपर्ने बताए । उनले ‘यात्री पीटू’ जस्ता स्वदेशी उत्पादन अमेरिकी बजारलगायत विश्वका विभिन्न क्षेत्रमा पुग्न सक्ने गरी प्रतिस्पर्धी बनाउनुपर्नेमा जोड दिए ।

मुग्लान न्युजमा प्रकाशित कुनै समाचारमा तपाईंको गुनासो भए हामीलाई muglannews02@gmail.com मा इमेल गर्न सक्नुहुनेछ । साथै तपाई आफ्नो बिजनेश प्रवद्र्धन गर्न चाहनुहुन्छ भने muglannews02@gmail.com मा सम्पर्क गर्न सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ ।