नयाँ प्रणालीसँगै लाइसेन्स सेवामा राष्ट्रिय परिचयपत्र, मोबाइल र इमेल अनिवार्य

काठमाडौं । यातायात व्यवस्था विभागले सवारी चालक अनुमतिपत्र (लाइसेन्स) लगायत यातायातसम्बन्धी सेवाहरूलाई थप व्यवस्थित बनाउन नयाँ अनलाइन प्रणाली कार्यान्वयनमा ल्याएको छ ।

२०८३ साउन १ गतेदेखि लागू भएको नयाँ प्रणालीमार्फत लाइसेन्सको नयाँ आवेदन फारम भर्न तथा विवरण अद्यावधिक गर्न राष्ट्रिय परिचयपत्र, सेवाग्राहीकै नाममा दर्ता भएको मोबाइल नम्बर र इमेल अनिवार्य गरिएको छ ।

नयाँ प्रणाली कार्यान्वयन तथा सर्भर अपग्रेडका क्रममा सिस्टम डाउन भएपछि साउन १ गतेदेखि करिब तीन सातासम्म देशभरका यातायात कार्यालयबाट प्रदान हुँदै आएका यातायातसम्बन्धी सेवा प्रभावित भएका थिए ।

हाल भने नयाँ प्रणाली सञ्चालनमा आइसकेको र यातायातसम्बन्धी सेवाहरू पुनः नियमित रूपमा सञ्चालन भइरहेको यातायात व्यवस्था विभागका निर्देशक केशव खतिवडाले जानकारी दिएका छन् ।

विभागका अनुसार नयाँ प्रणालीमार्फत सेवाग्राहीको विवरणलाई थप व्यवस्थित र सुरक्षित बनाउँदै यातायातसम्बन्धी सेवा प्रवाहलाई सहज बनाउने लक्ष्य राखिएको छ ।