देशभरका ५० केन्द्रमा एसईईको उत्तरपुस्तिका परीक्षण, दैनिक ३० हजार शिक्षक परिचालन

काठमाडौं । माध्यामिक शिक्षा परीक्षा एसईईको उत्तरपुस्तिका परीक्षण सुरु भएको छ । परीक्षा नियन्त्रण कार्यालय (कक्षा १०)का अनुसार हिजो (शनिबार) परीक्षणको काम सुरु भएको हो । बोर्डका अध्यक्ष डा. महाश्रम शर्माले विज्ञप्ति जारी गर्दै महासंघको नेतृत्वमा भइरहेको आन्दोलनमा सहभागी शिक्षकहरुलाई आग्रह गरेका थिए ।उत्तरपुस्तिका सम्बन्धित विषयका विज्ञ शिक्षकले परीक्षण गर्दै आएका छन्। उनीहरूलाई जिल्ला शिक्षा समन्वय एकाइले परिचालन गर्दै आएको छ।

उत्तरपुस्तिका परीक्षण १५ दिनभित्र गरिसक्ने लक्ष्य कार्यालयको छ। परीक्षा नियन्त्रक भट्टराईले भने, ‘उत्तरपुस्तिका परीक्षणका लागि विज्ञ शिक्षक परिचालन भइरहेका छन्। यो प्राविधिक काम पनि हो। त्यसैले यति नै दिनमा भन्नेचाहिँ हुँदैन। हामीले १५ दिनभित्र सक्ने लक्ष्य राखेका छौँ।’

बोर्डले परीक्षाफल आगामी असार ७ गतेभित्र सार्वजनिक गर्ने भने पनि उत्तरपुस्तिका परीक्षण तोकिएको समयमा हुन नसकेकाले परीक्षाफल प्रकाशनमा केही ढिलाइ हुने भएको छ।

२० चैतदेखि २९ दिन शिक्षकहरूको आन्दोलनका कारण परीक्षणमा ढिलाइ भएको हो । एसईई परीक्षा गत ७ चैतदेखि सञ्चालन भएको थियो । परीक्षामा नियमिततर्फ ४ लाख ३१ हजार ४६६ र ग्रेडवृद्धितर्फ ६७ हजार ७१५ गरी जम्मा ४ लाख ९९ हजार १८३ विद्यार्थीहरू समावेश थिए ।