चुनावी धक्का अस्थायी मात्रै हो, एमाले फेरि उठ्छ : ओली

काठमाडौँ । नेकपा एमालेका अध्यक्ष केपी शर्मा ओलीले निर्वाचनमा पार्टीले धक्का खेपेको भए पनि एमाले समाप्त नभएको बताएका छन्।

जननेतामदन भण्डारीको  ७५औँ जन्मजयन्ती समारोहलाई सम्बोधन गर्दै ओलीले एमाले अहिले संघर्षको अवस्थामा रहेको तर पुनः सशक्त रूपमा उठ्ने दाबी गरे।

उनले भने, “निर्वाचनमा हामीले धक्का खाएका छौँ। तर धक्का खानु र समाप्त हुनु फरक कुरा हो। हामी अहिले लडेका हौँ, मरेका होइनौँ। फेरि उठ्छौँ र प्रतिक्रियावादी शक्तिलाई पराजित गर्छौँ।”

ओलीले वर्तमान सरकारको आलोचना गर्दै संसद् बोलाइएको अवस्थामा पनि अध्यादेशमार्फत शासन चलाउने प्रयास भएको आरोप लगाए। उनले सरकारका गैरसंवैधानिक गतिविधि रोक्न वामपन्थी शक्तिहरू एकजुट हुनुपर्ने आवश्यकता औँल्याए।

उनले एमाले संकुचित सोचबाट टाढा रहेको तर असम्भव र असंवैधानिक गतिविधिप्रति उदार नरहेको बताए। साथै, सरकारका कदमविरुद्ध लोकतान्त्रिक र वामपन्थी शक्तिबीच सहकार्य आवश्यक रहेको धारणा राखे।

ओलीले नेपाली कांग्रेस फुटेको प्रसंग उल्लेख गर्दै अन्य दलहरूलाई पनि विभाजन गर्ने प्रयास भइरहेको दाबी गरे। एमाले बलियो, संगठित र आफ्ना उद्देश्यप्रति सचेत पार्टी भएकाले कुनै पनि षड्यन्त्रलाई पराजित गर्ने उनले बताए।