चीनको अनुभवबाट नेपालले लाभ लिनुपर्ने

काठमाडौं/ २ मङ्सिर, प्रधानमन्त्री केपी शर्मा ओलीको आसन्न चीन भ्रमणका क्रममा त्यहाँको अनुभवबाट सिकेर नेपालले फाइदा लिन सक्नुपर्ने कुरा प्राथमिकतामा राख्न विज्ञहरूले सुझाव दिएका छन् । फ्रेन्डस् अफ चाइनाले शनिबार राजधानीमा आयोजना गरेको ‘आधुनिक चीनसँग नेपालको दुईपक्षीय सम्बन्ध’ विषयक अन्तर्क्रियामा उनीहरूले चिनियाँ लगानी आकर्षण, चीनको शिक्षाको मोडेल र अनुभवबाट नेपाललाई शिक्षाको हब निर्माण जस्ता विषय प्रधानमन्त्रीको भ्रमणको मुख्य प्राथमिकता बनाउन आग्रह गरेका हुन् ।

त्रिभुवन विश्वविद्यालयका प्राध्यापक विपिन देवले प्रधानमन्त्रीले कुनै पनि देशको भ्रमण गर्दा एक भ्रमण, एक योजना बनाउनुपर्ने भन्दै चिनियाँ अनुभव, पुँजी र चिनियाँ लगानी ल्याउने कुरालाई प्राथमिकता दिनुपर्ने बताउनुभयो ।
त्रिभुवन विश्वविद्यालयका अर्का प्राध्यापक केशव सिग्देलले नवप्रवर्तनकारी काम गर्न चीनसँग सहयोग माग्ने र नेपालमा उद्योग खोल्न लगाउने पहल गर्न सके रोजगारीको अवसर सिर्जना हुनुका साथै युवाहरू विदेश पलायन हुनबाट रोक्ने वातावरण बन्ने बताउनुभयो ।
कार्यक्रमका अर्का वक्ता डा. विक्रम तिमल्सिनाले विश्वास र सद्भावबाट नै दुई देशबिचको सम्बन्ध प्रगाढ र बलियो बन्ने भन्दै यसबाट दुई देशबिचको सम्बन्ध पनि मजबुत हुने बताउनुभयो ।
कार्यक्रममा बागमती प्रदेशका सभामुख भुवन पाठकले प्रधानमन्त्रीले भ्रमण गर्दा एजेन्डा र प्राथमिकतामा अलमल हुने गरेको भन्दै यस पटक त्यस्तो हुन नहुने बताउनुभयो ।