हेलम्बु क्षेत्रका जनतालाई सचेत रहन पूर्वमन्त्री बस्नेतको आग्रह

सिन्धुपाल्चोक । लगातारको वर्षापछि मेलम्ची खोलामा आएको बाढीका कारण सिन्धुपाल्चोक हेलम्बु गाउँपालिका चनौटे बजारस्थित बेलिब्रिज जोखिममा परेको छ ।

अविरल बर्षासँगै आएको बाढीले बेलिब्रिज रहेको भूभाग कटान गर्न थालेपछि बेलिब्रिज जोखिममा परेको हो ।

पूर्वस्वास्थ्य मन्त्री तथा सिन्धुपाल्चोकका प्रतिनिधिसभा सदस्य मोहन बहादुर बस्नेतले चनौटे पुल वर्षासँगै खोलामा आएको बाढीका कारण उच्च जोखिममा रहेको बताउँदै त्यसक्षेत्रमा रहेका जनतालाई होसियार रहन र सडक अवस्था बुझेर मात्र यात्रा गर्न आग्रह गरेका छन् ।

उनले हेलम्बुदेखि मेलम्ची नदी किनारमा बसेबास गर्दै आएका सबैलाई होसियार रहन आग्रह गरेका हुन् । उनले यस पुललाई बचाउन आफूले सक्दो सहयोग गर्ने प्रतिबद्धता समेत जनाएका छन् ।

पुलले हेलम्बुलाई मात्र नभइ मेलम्ची नगरपालिका वडा ७ र ८ त्यस्तै पाँचपोखरी थाङपाल गाउँपालिकाको वडा न १ र २ का स्थानीयलाई समेत आवतजावत गर्न सहज बनाउदै आएको छ । रातो पुल बगाएको झण्डै सात महिनासम्म सास्ति खेपेका हेलम्बुबासी बल्लतल्ल निर्माण भएको बेलिब्रिज पनि बाढीले बगाउला भन्ने चिन्तामा छन् ।

त्यस्तै लगातारको वर्षका कारण मेलम्ची नदीले खतराको तह नाघेको छ । हेलम्बु, नाकोतेमा राखिएको जलसतह मापन केन्द्रमा नदीले खतराको तह नाघेको जल तथा मौसम विभागको तथ्याङ्कले जनाएको छ ।

तथ्याङ्क अनुसार मेलम्ची नदीको सचेतना तह ४ दशमलव ५ मिटर हो भने खतराको तह ५ दशमलव ५ मिटर हो । लगातारको वर्षाका कारण नदीको तह ५ दशमलव ६६३ मिटर पुगेको छ ।

खतराको तहबाट ० दशमलव १६३ मिटर बढी भएपछि जिल्ला प्रशासन कार्यालय सिन्धुपाल्चोकले नदी किनारका स्थानीयहरुलाई सजग र सुरक्षित रहन आग्रह गरेको छ ।