घरदैलो सहित चुनावी कार्यक्रमलाई तिब्रता दिदै बाँकेका आजपा उम्मेदवार शर्मा

नेपालगंज, ६ फागुन । आम जनता पार्टी (आजपा)का नेतृ एवं बाँके– ३ की उम्मेदवार विध्या शर्माले घरदैलो कार्यक्रमलाई तिब्रता दिएकी छन् । घरदैलो, भेला, छलफल, भेटघाट लगायत चुनावी कार्यक्रममा व्यस्त रहेकी शर्माले आज सम्पर्क कार्यालयका साथै निर्वाचन परिचालन कमिटी गठन गरेकी छन् ।

बाँकेको जानकी गाउँपालिका–३ करीयातीपूर्वा, भाटनपूर्वा, कोठारपुरमा आज चुनावी कार्यक्रम सम्पन्न भएको छ । कार्यक्रम उत्साह, उर्जा, परिवर्तनको आशा सहित सम्पन्न भएको र बाँके–३ का उम्मेदवार शर्माको पक्षमा जनलहर बढिरहेको उनका सहयोगी श्रीकृष्ण शर्माले जनाएका छन् ।

‘आम जनता पार्टीका उम्मेदवारको पक्षमा जनलहर बढदै गइरहेको छ । यसपटक आम मतदाताले मोबाइल छापमा मतदान गरी मोबाइल छापका उम्मेदवारलाई बिजयी गराउन उत्साहित हुनुभएको छ,’ बाँके–३ का उम्मेदवार शर्माले बताइन् ।

चुनावी र्याली तथा घरदैलो कार्यक्रम गर्दै आम मतदातासंग शर्माले भेटघाट गरिरहेकी छन् । ‘परिवर्तनको लहर अब रोकिँदै, जनता जागिसकेका छन्् । मोबाइल चिन्हमा मतदान गरौं, नयाँ नेपाल निर्माण गरौं भन्ने उदेश्यले हामी जनताका बीचमा पुगिरहेका छौं, शर्माले बताइन् ।

शर्माले नेपालगंज स्थित भेरी अस्पताललाई मेडिकल कलेजको रुपमा विकास गर्दै यहाँको नागरिकलाई गुणस्तरीय स्वास्थय सेवा उपलब्ध गराउने प्रतिबद्धता व्यक्त गरेकी छन् । ‘नेपालगंज लुम्बिनी प्रदेशको मात्रै नभई कर्णालीको समेत केन्द्र हो । तर नेपालगंजमा बाँके जिल्लाका मात्रै नभई कर्णाली सहितका अन्य जिल्लाबाट उपचार गराउन विरामीहरु आउने गरेका छन् । तर यहाँको सरकारी अस्पतालको सेवासुविधा गरिब, निमुखा, आवाज विहीन जनताले स्वास्थ्य उपचार नपाएको गुनासो छ,’ शर्माले भनिन्, ‘यस क्षेत्रमा एक मेडिकल कलेजको आवश्यक्ता छ । नेपालगंजको भेरी अस्पताललाई मेडिकल कलेज बनाउन म पहल गर्छु । जसले यस क्षेत्रका नागरिकले राम्रो स्वस्थ्य उपचारका साथै विद्यार्थीहरुले एमबिबिएससम्मको पढाई पनि गर्न पाउँछन् ।’

बाँके जिल्लामा स्वास्थ्यका साथै खानेपानी, जेष्ठ नागरिकलाई दिनुपर्ने सेवा सुविधा, कृषी, सिचाई, मल, बिउ लगायतका विभिन्न समस्याहरु भए पनि यहाँबाट यसअघि चुनावमा जित्ने नेताहरुले काम नगर्दा आम नागरिक समस्या भोग्दै आइरहेको उनले बताइन् ।

बाँके–३ बाट आफू बिजयी भए यि समस्याहरुको ठोस रुपमा समाधान गर्दै यहाँका नागरिकलाई अत्याधिक सेवा सुविधा दिलाउन काम गर्ने प्रतिबद्धता शर्माले व्यक्त गरेकी छन् ।