गोरखाको छेकम्पारमा ठूलो पहिरो, स्यारखोला केही समय थुनियो

गोरखा । गोरखाको चुमनुब्री गाउँपालिका–७ छेकम्पारस्थित चौँरीखर्कपारि ठूलो पहिरो खसेपछि बूढीगण्डकीको सहायक नदी स्यारखोला केही समय थुनिएको छ ।

सोमबार बिहान करिब १० बजे खसेको पहिरो स्यारखोलाको छेउसम्म आइपुगेको स्थानीयले बताएका छन् ।

पहिरो ठूलो भए पनि हाल नदीमा ताल बनेको अवस्था नरहेको जनाइएको छ । नदीको बहाव ठाडो रहेकाले पानी साविककै गतिमा बगिरहेको स्थानीयले बताएका छन् ।

जिल्ला प्रहरी कार्यालय गोरखाले पनि बूढीगण्डकी नदीको बहाव सामान्य रहेको जनाएको छ ।

पहिरोका कारण नदीको बहावमा कुनै पनि बेला असर पर्न सक्ने सम्भावनालाई ध्यानमा राख्दै धादिङ–गोरखा हुँदै बग्ने बूढीगण्डकी नदी आसपासका बासिन्दालाई नदी किनारमा नजान र उच्च सतर्कता अपनाउन आग्रह गरिएको छ ।