काभा महिला भलिबलका लागि निरुता ठगुन्नाको कप्तानीमा नेपाली टोली घोषणा

काठमाडौं । जेठ ८ गतेदेखि १४ गतेसम्म काठमाडौंमा सञ्चालन हुने काभा महिला भलिबल च्याम्पियनसिपका लागि निरुता ठगुन्नाको कप्तानीमा १४ सदस्यीय नेपाली राष्ट्रिय महिला भलिबल टोली घोषणा गरिएको छ ।

घोषित टोलीमा कप्तान निरुता ठगुन्नासहित उषा भण्डारी, मिना सुनार, सलिना बुढामगर, कामना विष्ट, रिमा कुँवर, सलिना श्रेष्ठ, बसन्ती साउद, सुमित्रा रेग्मी, सुनिता खत्री, एलिशा मानन्धर, प्रगति नाथ, जसना महतो र शान्तिकला तामाङ रहेका छन् ।

प्रतियोगितामा नेपालसहित भारत, किर्गिस्तान, माल्दिभ्स, इरान, काजकिस्तान, श्रीलंका र बंगलादेशको सहभागिता रहनेछ । नेपाल पुल ‘ए’ मा भारत, किर्गिस्तान र माल्दिभ्ससँग रहेको छ ।

नेपालले उद्घाटन खेलमा जेठ ८ गते भारतसँग प्रतिस्पर्धा गर्नेछ । त्यसपछि जेठ ९ गते किर्गिस्तान र जेठ १० गते माल्दिभ्ससँग खेल्ने तालिका रहेको छ ।