काठमाडौँ महानगरको नयाँ व्यवस्था: असोज मसान्तभित्र व्यवसाय दर्ता गरे विगतका व्यवसाय कर मिनाहा

काठमाडौँ । काठमाडौँ महानगरपालिकाले यसअघि दर्ता नगरी सञ्चालनमा रहेका व्यवसायलाई लक्षित गर्दै कर छुटको विशेष व्यवस्था लागू गरेको छ। महानगरभित्र जुनसुकै समयदेखि सञ्चालनमा रहेका व्यवसायले २०८३ साल असोज मसान्तभित्र व्यवसाय दर्ता गरे अघिल्ला सबै वर्षको व्यवसाय कर मिनाहा हुने भएको हो।

महानगरको १९औँ नगरसभाबाट पारित आर्थिक ऐन अनुसार महानगर क्षेत्रभित्र सञ्चालन हुने सबै प्रकारका व्यवसायलाई १२ विधामा वर्गीकरण गरी दर्ता तथा नवीकरण शुल्क निर्धारण गरिएको छ। व्यवसायको प्रकृति, पुँजीगत लगानी र कार्यक्षेत्रलाई आधार मानेर करको दर तय गरिएको महानगरले जनाएको छ।

यसअघि आर्थिक वर्ष २०७२/७३ लाई करको आधार वर्ष मानिएकोमा नयाँ ऐनले २०७९/८० लाई आधार वर्षका रूपमा कायम गरेको छ। साथै, २०८३ असोज मसान्तभित्र व्यवसाय दर्ता गरे १० प्रतिशत शुल्क छुट दिइनेछ। तोकिएको समयपछि दर्ता गरे एक हजार रुपैयाँ अतिरिक्त जरिवाना लाग्ने व्यवस्था गरिएको छ।

आर्थिक ऐनले व्यापार, परामर्श, उद्योग, कृषि, होटल तथा पर्यटन, सञ्चार, वित्तीय सेवा, स्वास्थ्य, शिक्षा, मर्मत सम्भार, निर्माण र अन्य सेवा गरी १२ विधामा व्यवसाय वर्गीकरण गरेको छ।

नयाँ दरअनुसार क्यासिनोले सबैभन्दा बढी ३ लाख रुपैयाँ, पाँचतारे होटलले १ लाख रुपैयाँ, टेलिकम सेवा प्रदायकले १ लाख रुपैयाँ, मेडिकल कलेजले ३ लाख रुपैयाँ तथा वाणिज्य बैंकको केन्द्रीय कार्यालयले १ लाख रुपैयाँ व्यवसाय कर तिर्नुपर्नेछ।

सञ्चार क्षेत्रतर्फ अनलाइन समाचार पोर्टलका लागि ५ सय रुपैयाँ, स्थानीय पत्रिकाका लागि १ हजार रुपैयाँ र राष्ट्रिय पत्रिकाका लागि २ हजार रुपैयाँ व्यवसाय कर तोकिएको छ।

महानगरले सबै व्यवसायीलाई तोकिएको समयभित्र व्यवसाय दर्ता तथा कर तिरेर कानुनी प्रक्रिया पूरा गर्न आग्रह गरेको छ। आर्थिक ऐनको सूचीमा समावेश नभएका व्यवसायको कर दर भने राजस्व समितिको सिफारिसमा प्रमुखबाट स्वीकृत गरी निर्धारण गरिने व्यवस्था गरिएको छ।