कांग्रेसका नेताहरुले थाले हिन्दू राष्ट्र अभियान

मुग्लान न्युज २०८० फाल्गुन १०, बिहीबार , प्रकाशित राजनीति | समाचार

काठमाडौं । नेपाली कांग्रेसका नेताहरुले हिन्दू राष्ट्र अभियान अघि बढाएका छन् ।

सोमबारदेखि शुरु भएको महासमिति बैठकमा पहिलो दिनदेखि नै हिन्दू राष्ट्रका अभियानकर्मीहरुले हस्ताक्षर संकलन गरिरहेका थिए ।

वैदिक सनातन हिन्दुराष्ट्र स्थापना गर्ने अभियानले एक हजार ६१ जनाको हस्ताक्षर पार्टी सभापति शेरबहादुर देउवालाई बुझाइएको छ ।

महासमिति बैठक समापनको शुरुमा अभियानका संयोजक एवं केन्द्रीय सदस्य शंकर भण्डारीले सभापति देउवालाई हस्ताक्षर बुझाएको अभियानका सहसंयोजक लोकेश ढकालले जानकारी गराए । ढकालका अनुसार पूर्वमहामन्त्री डा. शंशाक कोइरालासहित ४२ जना केन्द्रीय सदस्यले त्यसमा हस्ताक्षर गरेका छन् ।

ललितपुरको गोदावरीस्थित सनराइज हलमा भएको महासमिति बैठकको हल अगाडि अभियानका अगुवाहरु पाल टाँगेर हस्ताक्षर गराउन जुटेका थिए ।

यसअघिको महासमिति बैठकमा पनि हिन्दुराष्ट्रको पक्षमा ७१४ जनाले हस्ताक्षर गरेर सभापतिलाई बुझाइएको थियो । २२ जना केन्द्रीय सदस्यले हिन्दू राष्ट्रको एजेण्डामा महासमिति बैठकमा छलफलको एजेण्डा बनाउनुपर्ने मागसहित सभापति देउवालाई हस्ताक्षर बुझाएका थिए ।
हिन्दुराष्ट्रको एजेण्डाले भने महासमिति बैठकमा छलफलको विषय भने नबनेको कांग्रेसका नेताहरुले बताएका छन् ।

मुग्लान न्युजमा प्रकाशित कुनै समाचारमा तपाईंको गुनासो भए हामीलाई muglannews02@gmail.com मा इमेल गर्न सक्नुहुनेछ । साथै तपाई आफ्नो बिजनेश प्रवद्र्धन गर्न चाहनुहुन्छ भने muglannews02@gmail.com मा सम्पर्क गर्न सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ ।