एफएनसीसीआईमा नयाँ नेतृत्व चयन आज, दुई समूहबीच कडा प्रतिस्पर्धा

काठमाडौँ — नेपाल उद्योग वाणिज्य महासंघ को वार्षिक साधारणसभाको दोस्रो दिन मंगलबार नयाँ नेतृत्व चयनका लागि मतदान हुँदैछ।

महासंघको विधानअनुसार वर्तमान वरिष्ठ उपाध्यक्ष अञ्जन श्रेष्ठ स्वतः अध्यक्ष बन्नेछन् भने उपाध्यक्ष र कार्यकारिणी समिति सदस्य पदका लागि निर्वाचन हुन लागेको निर्वाचन समितिले जनाएको छ।

नयाँ कार्यकारिणी समितिको गठनका लागि मुख्यतः दुई समूहबीच प्रतिस्पर्धा देखिएको छ। एकतर्फ भावी अध्यक्ष श्रेष्ठ समर्थित समूह रहेको छ भने अर्कोतर्फ हेमराज ढकाल नेतृत्वको समूह चुनावी मैदानमा छ।

श्रेष्ठ पक्षले वस्तुगत उपाध्यक्षमा शिवप्रसाद घिमिरे लाई अघि सारेको छ। उक्त प्यानलबाट कार्यकारिणी सदस्यमा कृष्णप्रसाद अवला र विश्वनाथ खनाल उम्मेदवार रहेका छन्। एसोसिएट उपाध्यक्षमा प्रबलजंग पाण्डे छन् भने जिल्ला–नगर उपाध्यक्षमा कृष्णप्रसाद शर्मा र दिलसुन्दर श्रेष्ठ ले उम्मेदवारी दिएका छन्।

यता ढकाल समूहबाट जिल्ला–नगरतर्फ उपाध्यक्षमा उमेश डालमिया र कल्पना गैरे प्रतिस्पर्धामा छन्। वस्तुगत उपाध्यक्षमा नरेशलाल श्रेष्ठ तथा एसोसिएट उपाध्यक्षमा ज्योत्सना श्रेष्ठ उम्मेदवार छन्।

महासंघको नयाँ कार्यकारिणी चयनका लागि ७३ पदमा १३७ व्यवसायीले उम्मेदवारी दिएका छन्। मतदान बिहान ८ बजेदेखि बेलुका ४ बजेसम्म हुनेछ भने प्रज्ञा भवन मा मतदान सम्पन्न भएलगत्तै मतगणना सुरु गरिनेछ।