उद्योग वाणिज्य महासंघमा वस्तुगत परिषद् गठन, निजी क्षेत्रको आवाज सशक्त बनाउने प्रतिबद्धता

काठमाडौं । नेपाल उद्योग वाणिज्य महासंघ (एफएनसीसीआई) अन्तर्गत विभिन्न वस्तुगत संघ–संस्थाको प्रतिनिधित्व रहने वस्तुगत परिषद् गठन गरिएको छ। परिषद् गठनसँगै नवनियुक्त सदस्यहरूलाई बुधबार महासंघ सचिवालयमा आयोजित कार्यक्रममा मनोनयन पत्र प्रदान गरिएको हो।

कार्यक्रममा महासंघका कार्यवाहक अध्यक्ष सुरकृष्ण वैद्यले नवनियुक्त सदस्यहरूलाई बधाई तथा सफल कार्यकालको शुभकामना व्यक्त गर्दै वस्तुगत परिषद्ले निजी क्षेत्रको साझा आवाजलाई थप सशक्त बनाउने विश्वास व्यक्त गरे।

उनले उद्योग तथा व्यवसायसँग सम्बन्धित नीतिगत सुधार, लगानी प्रवर्द्धन, उत्पादन तथा निर्यात विस्तार र निजी क्षेत्रका समस्या समाधानमा परिषद्ले सक्रिय तथा परिणाममुखी भूमिका निर्वाह गर्नुपर्नेमा जोड दिए। निजी क्षेत्र र सरकारबीच प्रभावकारी समन्वय स्थापित गर्दै मुलुकको आर्थिक विकासमा परिषद्को योगदान महत्त्वपूर्ण रहने उनको भनाइ थियो।

महासंघका जिल्ला तथा नगर उपाध्यक्ष दिल सुन्दर श्रेष्ठले वस्तुगत परिषद् महासंघको महत्त्वपूर्ण अंग भएको उल्लेख गर्दै विभिन्न क्षेत्रबाट उठेका समस्या समाधानमा यसको प्रभावकारी भूमिका रहने बताए।

त्यस्तै, वस्तुगत उपाध्यक्ष तथा परिषद्का सभापति नरेशलाल श्रेष्ठले महासंघका वस्तुगत सदस्य संघहरू नै निजी क्षेत्रको मेरुदण्ड भएको उल्लेख गर्दै उद्योग–व्यवसायका साझा एजेन्डालाई एकीकृत रूपमा अघि बढाउन परिषद्ले प्रभावकारी भूमिका खेल्ने विश्वास व्यक्त गरे। उनले परिषद्का सदस्यहरूलाई तथ्यांकमा आधारित अध्ययन–अनुसन्धान गरी नीतिगत सुझाव प्रस्तुत गर्न र निजी क्षेत्रको हित संरक्षण तथा प्रवर्द्धनमा सक्रिय हुन आग्रह गरे।

एसोसिएट उपाध्यक्ष एवं रोजगारदाता परिषद्का सभापति प्रवलजंग पाण्डेले मुलुकको अर्थतन्त्र अझै पूर्ण रूपमा लयमा फर्किन नसकेको र लगानीको वातावरण चुनौतीपूर्ण रहेको अवस्थामा व्यावसायिक गतिविधि विस्तारमार्फत अर्थतन्त्रलाई चलायमान बनाउन परिषद्को भूमिका महत्त्वपूर्ण हुने बताए।

महासंघका कोषाध्यक्ष मनिषलाल प्रधानले परिषद् तथा विभिन्न समितिका गतिविधिले नै महासंघलाई सक्रिय बनाउने उल्लेख गर्दै परिणाममुखी कार्यशैली अपनाएर अर्थतन्त्रलाई गति दिने गरी काम गर्नुपर्ने आवश्यकता औंल्याए।

यसैबीच, बुधबार बसेको वस्तुगत परिषद्को बैठकले भक्तबहादुर हमाललाई परिषद्को उपसभापतिमा मनोनयन गरेको छ। महासंघमा हाल विभिन्न क्षेत्रका १४२ वटा वस्तुगत सदस्य संघ आबद्ध रहेका छन्।