अमेरिकाको न्युयोर्कमा झल्कियो नेपाल

न्युयोर्क । अमेरिकाको न्युयोर्क, म्यानहाटन सहर आइतबार दिनभर नेपाली संगीतले गुल्जार थियो । नेपालका विभिन्न जातजाति र क्षेत्रका मानिसहरु आआफ्नै भेषभुषामा सजिएका थिए ।

पञ्चे बाजा, भजन, देउडा, सोरठी, मैथिली, शेर्पा र तामाङ सेलोले गुञ्जिएको विदेशी भूमिमा पनि नेपालकै झझल्को दिइरहेको थियो । सन्दर्भ थियो, अमेरिकाको न्युयोर्क सहरमा नेपाल डे परेड ।

परेडमा विभिन्न संघसंस्थाका व्यानरसहित नेपाली र नेपाली अमेरिकनहरुको उपस्थिति थियो । गैरआवासीय नेपाली संघ, अमेरिका न्युयोर्क च्याप्टरको मूल आयोजना र स्थानीय नेपाली संघसंस्थाको सहकार्य र समन्वयमा नेपाल डे परेड भएको हो । नेपालको गणतन्त्र दिवसको सेरोफेरो पारेर सन् २०१६ देखि नेपाल डे परेड गर्न थालिएको हो ।

नेपाल डे परेडमा न्युयोर्क सहरका मेयर एरिक एडम्स, अमेरिकी सिनेटका मेजोरिटी लिडर चक सुमर, न्युयोर्क राज्यका सांसद स्टेभन रागालगायत स्थानीय जनप्रतिनिधिहरुको पनि उपस्थिति थियो । उनीहरुले रुचिका साथ अवलोकन गरेका थिए ।

नेपालको विविध कला, संस्कृति र परम्परा झल्किने गरी गरिएको सांगितिक प्रस्तुतिले म्यानहाटन सहरलाई नेपालमय बनाएको थियो । नेपाली पोशाक, झण्डा र ब्यानरसहित नाचगान र बाजा बजाउँदै सहर परिक्रमा गरिएको थियो । नेपाल डे परेडमा न्युयोर्क, न्युजर्सी र कनेक्टिकटबाट सहभागी हुन आएका थिए ।

सभामा नेपाली महावाणिज्य दूतावास न्युयोर्ककी वाणिज्यदूत विष्णु अधिकारी, नेपाल सरकारका पर्यटन प्रवर्द्धक गोकुल श्रेष्ठ, उपवाणिज्यदूत संगीता न्यौपाने सहभागी थिए । परेडका लागि अध्यक्ष हेमन्त मल्ल थिए ई. टेम्बा शेर्पालाई कन्भेनरको जिम्मेवारी दिइएको थियो ।